أشياء كنّا نفعلها ببراءة

فاكرة و احنا صغيرين .. لما كنتي بتزعلي مني

كنتي بتقعدي على سلم بيتنا و انتي مكشرة و ايديكي الاتنين على خدك

كنت بحب شكلك و أنتي قاعدة كده

بس مكنتش بحب تكوني زعلانة مني علشان مكنتش بلاقي حد العب معاه

كنت ساعتها لسه عيل مش بعرف أطلع من الشارع علشان أجيبلك ورد

مكنتش أعرف نظرية الورد أصلاً

كنت بفضل ألف حواليكي و أنا بتكلم وأنتي مش بتردى عليا

كنت بروح أجيب طوفي من قدام البيت

واحطه كله قدامك و ابوس خدك

و اطلع بيتنا زعلان

بعد الضهر تنادي عليا من المنور علشان ننزل نلعب مع بعض على السلم

كنت بعمل نفسي مش سامعك

لحد ماتيجي تخبطى على بابنا و ماما تناديني علشان العب معاكي

كنت بنزل العب معاكي و تقسمى معايا الطوفي