زي ماتحبي

بحبك زي ما تحبي

بحبك شمس طالعة تنور الدنيا

وورد أحمر على خدودك

ينقط شهد عاللي تحبي من قلبك

بحبك جوه فستانك

و ألوانك

هادية و ملفتة و تخبل

تخلي الورد يتحير لما تعدي قدامه

و ينسى يعنى إيه الورد و الألوان

يشبِّه يقول كان في زمان

وردة شبه اللي ماشية هناك

وريحة طالعة تقلب الدنيا

وتسأل هي مين ديه ؟؟

بأنانية

ابتسم و اسكت

و اسيب الدنيا بتدور على الوردة أم ريحة جنان

مقولش إنك قاعدة قدامي

و أقول الدنيا دي ليا

بتتبسم

فتتجسم

قدامي في شكل إنسانه

دنيا غير دنية بقية الناس

دنيا بخد و غمازتين

تنسيك يعني إيه دنيا

و كلمة جوة مش طالعة

تحس إن الكلام ممكن يموت من الخضة لو اتقالت

تبقى خلاص على لساني

يدوب حنطق

تطلع لسانها تقولي مش طالعة